Duke qenë se dhuna dhe ngacmimet seksuale në vendin e punës përbëjnë abuzim dhe shkelje të të drejtave të njeriut, Palët Sociale nënshkruese të kësaj kontrate C.C.N.L. bien dakord të promovojnë iniciativa me qëllim që të parandalojnë dhe luftojnë sjellje të tilla të papranueshme dhe të papajtueshme me respektin ndaj personit njerëzor, Palët pajtohen plotësisht me parimet e shprehura në Marrëveshjen Evropiane të nënshkruar më 26 prill 2007 “Marrëveshja kuadër për ngacmimin dhe dhunën në vendet e punës”, në Rekomandimin ILO n. 206 të vitit 2019 dhe në Konventën e ILO-s n.190 të aprovuar në qershor 2019 dhe në Marrëveshjet Ndërkonfederale të nënshkruara nga Shoqatat e Punëdhënësve dhe Sindikatat (OO.SS.).
Kodi i Mundësive të Barabarta, sipas D.Lgjs. 198/2006, saktëson si detyrim të punëdhënësit që të sigurojë kushte pune të tilla që të garantojnë integritetin fizik e moral dhe dinjitetin e punonjësve, si dhe mirëqenien psikologjike të punëtoreve dhe punëtorëve.
Për këtë qëllim, identifikohen iniciativa të karakterit informativ dhe formues, që synojnë të luftojnë, të parandalojnë dhe të mos tolerojnë sjelljet diskriminuese të bazuara në diversitet (larmi, etnike, race, etj.) dhe në veçanti dhunën apo ngacmimin seksual në vendet e punës, në mënyrë që të garantohet respektimi i dinjitetit të secilit dhe të favorizohen marrëdhëniet ndërpersonale, të bazuara në parimet e barazisë dhe të korrektësisë reciproke.
Në programet e formimit të personelit dhe drejtuesve, ndërmarrjet do të duhet të përfshijnë informacionet në lidhje me orientimet e adoptuara në lidhje me parandalimin e ngacmimeve seksuale dhe për procedurat që duhen ndjekur nëse ndodh ngacmimi.
Do të përgatiten nga ndërmarrjet, ndërhyrje specifike formimi, të cilat do të realizohen edhe nëpërmjet Fondeve Ndërprofesionale, në lidhje me mbrojtjen e lirisë dhe të dinjitetit të personit, me qëllim që të parandalohen shfaqjen e sjelljeve që mund të konfigurohen si ngacmime seksuale dhe për të nxitur sjellje të veçanta që synojnë përhapjen e kulturës së respektit ndaj personit.
Për këtë qëllim, Organizatat Sindikale do të organizojnë asamble me personelin në lidhje me këto tema.
Ndërmarrjet do të përgatisin material informues që u drejtohet punëtoreve dhe punëtorëve mbi sjelljen që duhet të adoptojnë në rastin e ngacmimeve seksuale.
Brenda një muaji nga data e nënshkrimit të kësaj kontrate C.C.N.L., Palët do të përcaktojnë një Kod Sjelljeje/Linja Udhëzuese me masat dhe procedurat që do të adoptohen në luftën kundër dhunës dhe ngacmimeve seksuale në vendin e punës, të cilat do të përdoren nga ndërmarrjet e veçanta.